" سا " و " حا " و " ها "

ستقوم الوزارة بدراسة تحديد الحد الأدنى والحد الأقصى للمرتبات وستعرض الأمر على مجلس الوزراء بعد الدراسة وستتخذ ما يلزم بعدها , عشنا عمرا طويلا فى مسلسل " س " فى إشارة إلى المستقبل الذى لا يحدث فيه شئ على أرض الواقع و " س " هى بالبلدى " ح " حانعمل الدراسة المطلوبة وباللغة المستحدثة السخيفة تحولت " ح " إلى " ه " هانعمل , هندرس , هنهبل . هنضحك على الشعب بالمسكنات المعتادة ماركة " س " و " ح " و " ه " .
ما أشبه اليوم بالبارحة , نعم , ما أشبه وزارة عصام شرف بوزارة الببلاوى , نعم , ودى جت بعد ثورة والتانية كمان جت بعد فيضان ثورى ولا حياة لمن تنادى , الناس تقول الجماعة جماعة إرهابية , ترد الحكومة وتقول مصالحة , الناس تقول حل الجماعة ومصادرة أموالها لإصلاح ما أفسدوه من خراب , الوزارة تقول " حا " ندرس , الناس تقول الحد الأدنى والأقصى للمرتبات , الحكومة ترد " حا " نطنش , الناس تقول سرعة محاكمة مجرمى الإخوان , الحكومة ترد " حا " نشوف , الناس تقول حزب النور بيعطل مسيرة البلد والدستور , ترد الحكومة " حا " نديله فرصة , الناس تقول يجب التصدى لفوضى الإخوان فى الشوارع , أمال فرض حالة الطوارئ ليه , ترد الحكومة " حا " نتصدى , وهذه عينة وليس كل شئ الحكومة مطرمخه عليه .
ومش معقول إن كل كام شهر الشعب ينزل ويقوم بثورة عشان بهوات ما بعد الثورات مش بيفهموا الشعب عايز إيه , مفيش حد فى الحكومة دى وغيرها بيبل ريق أى موطن بحاجة تفرحه أو تحقق أى حاجة عايزها .
وأوعدكم أن الشعب " س " ينقلب عليكم ومش " حا " يسكت على طناشكم و " ها " تشوفوا رد فعله القاسى عليكم وإللى مصبره عليكم الأيام دى هو إحساسه بالمسئولية الوطنية فى الوقت الراهن إللى الجيش والشرطة بيواجهوا فيه إرهاب الجماعات إللى إنتم عايزين تصالحوها وحقهم فى ممارسة الحياة السياسة دون إقصاء , ياخى كسر حقك منك له .